Tata Ibadah Tahun Baru (Bahasa Nias)

Download Tata Ibadah (DOC)

Download Tata Ibadah (PDF)

Kamis, 1 Januari 2026 (Tahun Baru) FANGOWAI BA FOGAONI [Tedõni dorosi, mõi ndra sohalõwõ bakha ba gosali, ba lahalõ wangahono dõdõ banua niha Keriso ba wangondrasi ba ba wasumangeta khõ Lowalangi] FANGOWAI Liturgos : Ya’ami banua niha Keriso,ba wondrugida böröta ndröfi sibohou andre, ma’owai ami ba döi Zo’aya yaita Yesu Keriso. Ya’ahowu ndröfi sibohou! Jemaat : Ya'ahowu! Liturgos : Yafao-fao khõmi Lowalangi! Jemaat : Ya fao khõu Geheha-Nia! FOGAONI Liturgos : Da ta’owuawua’õ dõdõda wangondrasi Yehowa, da ta’omusoi’õ dõdõda ba wamalua fasumangeta khõ Lowalangi. Tasuno Ia, manunõ ita moroi ba Mbuku Zinunõ Numero 74 : 1-2 Da tasuno Ia, moroi ba dödöda. Me no dozi oi tatema, wa’omasi-Nia. No döfi wa’ara, Irorogö ita. Ba no Itimba wangala, ohahau dödöda. Lö fanulöni sa wa’omasi-U khöma. Ha fangandrö saohagölö, moroi ba dödöma. Ba ndröfi fönama, rorogö ndra’aga. Ha Ya’ugö wulitöma, he Yesu So’aya. No tobini khöma, wozu wa’aurima. Ba no tohöna Ö’ila, So’aya ya’aga. Bè khöma Geheha, sanuturu lala. Me no oya wabaliwa, tanömö de’ala. Fawu’usali-Mö, we’ewe’edödö. Fa’omasi-U he So’aya, möi fangorifima. Bönökhi na khöma, fefu zo’amböta. Ba wogamö sawatöma wanema femöna. Mangandrö ndra’aga salahi nawöma. Si no faröi ba wamati, sambö fanötöna. Na irugi bawa wozu wekolima. Ma’andrö khö-U he So’aya, tema wa’aurima. FANGA’ARO’Õ WA’OWULO (VOTUM) Liturgos : Da tahonogõ dõdõda ba wariawõsa, ba ba wa ha sambua khõ Lowalangi, muzizio zato. No owulo ita ba da’e, ba dõi Lowalangi Ama, ba ba dõi Nono-Nia Yesu Keriso, ba ba dõi Geheha Ni’amoni’õ. Fangorifida ha ba dõi Yehowa si no mombõi banua si yaẅa awõ danõ! Jemaat : Yaduhu! Liturgos : Ufaöga hörögu, ufaigi hili andrö: Heza i’otarai fangorifigu? Fangorifigu andrö, ba i’otarai Yehowa, somböi banua si yawa, awö danö. Lö’ö sa Ibe’e mangiwa gaheu; samaigimaigi ya’ugö andrö, ba lö manuköu. Irorogö ndra’ugö Yehowa, Itimba zi lö sökhi fefu, Irorogö nosou (Sinunö 121:1-3, 7) HALELUYA!!! Liturgos : Mangandrõ ita, "He Yehowa Lowalangima, si no umbu howuhowu ba fa’omasi. Möiga khö-U mangalulu ba wangandrö saohagölö me lö si faröi Ndra’ugö khöma ba zi döfi fa’ara, irege no makhamö mböröta ndröfi sibohou andre. Lö mamalö matou’öga ba danga-U ba zi döfi fa’ara mifönama. Ma’andrö khö-U, rorogöga ba wanohugö fekolima. Fatöröga ba lala andrö khö-U, ba fahaö ndra’aga ba wango’aurifagö fa’omasi, he ba wangomasi’öma Ya’ugö, ba si manö göi ba wangomasi’öma awöma niha awö niwöwöi fefu. Ya’ugö gubaloma, samatörö ya’aga ba si lö faröi khöma ba zi döfi fa’ara mifönama. Yaduhu! Mudadao Zato Liturgos : Manunõ ita moroi ba Mbuku Zinunõ Numero 79 : 1-2 Na isekhegö ndra’o Yesu, ha’uwa’ö wanema-li. Me no fahöna golalöwa, ba oya wangosiwawöi. No u’o’ö nikhoi dödögu, si möi fangala nosogu. Fefu manö ndrotondrotogu, no oya sa zi lö faudu. Na no matedo ba zilalö, fatua sawuyuhorö. Na lö ebolo dödö Yesu, si no mangefa’ö horö. U’ila wa no fönu Nama, zombaloi ya’odo sa’ae. Me ihöli ndra’o So’aya, wa aurido na iya’e. Tebai utaha wanutunö, horö si no ufalua. Barö ndröfi si no numalö, duhu oya golalöwa. Andrö wa mangesa dödögu, ba horögu sifahöna. Bologö dödö-U khögu Yesu, tema ndra’odo, So’aya. Fa’aurigu ba zi soföna, ululu sa’ae khö-U, Yesu. Fatörödo ba zomasi’Ö, ya khö-U manö wa’aurigu. Ya Öfaulugö wamohouni, fefu wa’aurigu andrö. Afu Ya’ugö utöngöni, me no Ya’ugö zawatö. Böi böhöli ndra’aga Yesu, götö wekoli ba danö. Me no tobini lualua, döröwa ero ma’ökhö. Eheha-Mö be samatörö, era’erama, tödö göi. Samè khöma fa’anaugölö, ba sangaro’ö famati. FOMBASO TAROMALI LOWALANGI (AMABU'ULA LI SIFÕFÕNA) Liturgos : Da tafondrondrongo daroma Li Lowalangi, tehalõ moroi ba zura V Moze 31 : 1-8 1 Ba mõi muhede ba Ndraono Gizeraëli fefu Moze, 2 imane khõra: Otu a dua wulu fakhe wa’aragu ba guli danõ iada’e, ba si tebai faofao sa’ae ndra’odo; ba noa gõi imane khõgu Yehowa; Lõ õ’õtõ Yoridano andrõ! 3 Lowalangiu, Yehowa zangõtõ fõnau, ba ya’ia zangohori niha andrõ fõnau, ba õ’ila õ’okhõgõ danõra. Yosua andrõ zangolõi’õ ya’ugõ; dali niwa’õ Yehowa. 4 Ilau khõra Yehowa wolaunia me ifakiko razo Ndraono Gamori andrõ, Sihona ba Ogi, fabaya tanõra. 5 Ibe’e ba dangami ira Yehowa, ba mi’o’õ sibai goroisa andrõ, mibe’enia khõmi, wolau khõra. 6 Bõi atalõ dõdõmi, mi’abe’e’õ ami! Bõi mi’ata’ufi ba bõi toke’a ami khõra! Fao sa khõu Lowalangiu, Yehowa, lõ ibõhõi ndra’ugõ, lõ farõi ia khõu. 7 Ba humede Moze khõ Yosua ba imane khõnia, ba zi so Ndraono Gizeraëli, fefu. Bõi atalõ dõdõu, abe’e’õ ndra’ugõ! Ya’ugõ sa zolohe ya’ira ba danõ andrõ, nifabu’u Yehowa fame’e khõ ndra tuara mege, si no mõi ba hõlu ia khõra, ba ya’ugõ zamaosa khõra. 8 Ba Yehowa zowaõwaõ fõnau, itolo ndra’ugõ, lõ ibõhõi’õ ba lõ farõi ia khõu. Bõi ata’ufi ba bõi abu dõdõu. Si manõ daroma Li Lowalangi, da tatema’õ faoma sinunõ moroi ba Mbuku Zinunõ Numero 3:2 SUMANGE LA'OHE KHÕU FANGANDRÕ FANGEFA HORÕ Liturgos : Ya’ami ira talifusõ, Na taŵa’õ lõ horõda, ba talimo ita, ba si duhu lõ’õ ba dõdõda. Na ta’ombakha’õ horõda, ba lõ farõi Ia, ba no satulõ Ia, fa I’efa’õ khõda horõ andrõ, Ihaogõ ita, awõ wa Iheta fefu zi lõ atulõ. Andrõ da mõi ita fõna Lowalangi si fao fangidengide’õ ba wangombakha horõda, muzizio zato. Mangandrõ ita, "He Yehowa, Ama khöma si so ba zorugo, ba khö Yesu Keriso sangorifi. No sebua fa’omasi Ndra’ugö khöma götögötö wa’ara. Ma’ondrasi Ndra’ugö ba nahia ni’amoni’ö, ba wangalulu ba ba wangandrö saohagölö, ba howuhowu si no falukha ndra’aga ba ndröfi si no matalu’i, ba me no Öfasao ndra’aga ba mböröta ndröfi sibohou andre. Mafaduhu’ö wa tenga si nangea ndra’aga tanö föna-Mö, me no fahöna horö si no mafalua ba ndröfi si no numalö, he ba wehedema, era’era dödöma, awö gamuatama si lö faudu ba daroma Li-Mö. Andrö möiga khö-U ba wangandrö fa’ahakhö dödö-U, ena’ö Ö’efa’ö khöma horöma andrö, si no mafalua, irege sohahau tödö ndra’aga wanohugö fekolima ba ndröfi andre si faudu ba zomasi Ndra’ugö" Jemaat : Manunõ moroi ba Mbuku Zinunõ No. 224 : 1 Liturgos : "Mi’aine khö-Gu, dozi serege tödö, awö zonoro, ba Ufolombase ami. Mihare’ö khömi kalo mbagi andrö khö-Gu ba mitöngöni khö-Gu, me no sebolo tödö Ndra’o ba si lö fayaŵa tödö, ba falukha ami wolombase dödömi. Moguna sa kalo mbagi andrö khö-Gu, ba no aoha noro andrö khö-Gu." Lakhõmi khõ Lowalangi si yawa! Jemaat : Manunõ moroi ba Mbuku Zinunõ No. 450 Liturgos : Dumadao Zato! FOMBASO TAROMA LI LOWALANGI (AMABU'ULA LI SIBOHOU) Liturgos : Da tafondrondrongo daroma Li Lowalangi, tehalõ moroi ba zura Heberaio 12 : 12-17 12 Andrõ mifuli mi’abe’e’õ danga, si no adada, ba balõduhi, si no atage andrõ; 13 ba mifaigi zadõlõ lala gahemi, fa lõ ahole zi no ombuyumbuyu, ena’õ abe’e atõ 14 Migohi wa’atulõ, ba niha fefu, ba fangohauhau andrõ; lõ’õ sa sangila So’aya dania, niha, na lõ da’õ. 15 Ba mifaigi, fa bõi falukha zi torõi furi, ba wa’ebua dõdõ andrõ, fa bõi molewiõ wa’a safeto, ba wamoborõ famakuyu, fa bõi ato zi gõna si ra’ira’iõ. 16 Bõi ta’i’a zohorõ, ba ma si lõ ngaroro, si mane Ezau andrõ, samawa fa’asia’ania, ha samuza femanga mbõli; 17 noa sa mirongo: dania gõi, me edõna itema howuhowu andrõ, ba tetibo ia; lõ’õ sa isõndra lala wamalalini era’era, he wa’ae no mowõi dawa hõrõnia, wangalui ya’ia. Ya’ahowu zamondrongo taroma Li Lowalangi ba same’e ba dõdõ (Luka 11:28) Jemaat : Yaduhu! FANGOWULOI FASÕMBATA Liturgos : Iada’e tebe’e khõda ginõtõ ba wolohe fasõmbatada khõ Lowalangi. Ta’osamuzaigõ wame’e, he fasõmbata si fõfõna, ba si manõ gõi zi mendrua awõ zi medõlu. Ba si ofõna ua da tafondrondrongo Li Lowalangi me imane: "Ba da’õ niwa’õgu: Na so zangatalisi tanõmõ, ba lõ oya’oya ibasi, ba na so zi lõ alimagõ tanõmõ, ba oya gõi ibasi dania. Ba balazi dõdõ zamõsana; bõi abu dõdõ, ba tenga niforege; si no aoha gõlõ fame’e, da’õ sa zomasi Lowalangi." (II Korindro 9:6-7) Tafa’ema fõna wasõmbata khõ Lowalangi, ba manunõ ita moroi ba Mbuku Zinunõ No. 261 2. Ya’e zumange fasõmbata ma be’e soroi ba dõdõma. 3. Ya’e zumange fasõmbata buala si’otarai Nama. 4. Ya’e zumange fasõmbata, boto, noso, ba fa’aurima. 5. Ya’e zumange fasõmbata, lõ irugi zomasi dõdõ-U. 6. Ya’e zumange fasõmbata, ma’aohasi gõlõ Zo’aya. Liturgos : Da tafasao wasõmbatada andre fõna Lowalangi, musindro ita fefu. [Koordinator Pelayan mangandrõ ba aefa da'õ ifa'ema wasõmbata khõ Pengkhotbah. Awai da'õ mangawuli ba nahia zamõsana] Liturgos : Da tafa’anõ dõdõda wamondrongo taroma Li Lowalangi, manunõ ita moroi ba Mbuku Zinunõ No. 163 [Pengkhotbah Mõi ba Mimbar] HUHUO SEBUA Pengkhotbah : Ya irorogõ dõdõmi, awõ gera’erami fa’ohahau dõdõ andrõ, khõ Lowalangi, sabõlõ moroi ba gera’era niha fefu, ba khõ Keriso Yesu. Mangandrõ ita...[Fangadrõ Famokai Huhuo Sebua] Amin. Fombaso Taroma Li Lowalangi moroi ba zura Amaedola 3 : 1-6 1 He onogu, bõi olifugõ’õ goroisagu andrõ, ba tanõ ba dõdõ nifakhoigu. 2 Ya’ia sa zame’e fahõna khõu wa’anau noso, noso ba ndrõfi ba fa’ohahau dõdõ! 3 Fa bõi aefa khõu wa’omasi ba fa lõ farõi; be’e aya ba mbagi khõu, ba ba naha zura ba dõdõu tanõ ia. 4 Ba õsõndra wa’ebua dõdõ ba fa’afaduhu dõdõ, ba Lowalangi ba ba niha. 5 Dõnadõna khõ Yehowa, moroi si’aikõ ba dõdõu, ba bõi abe’e dõdõu ba wa’onekheu. 6 Bõi aefa dõdõu khõnia, gofu hadia ia lala khõu, ba ya’ia zangadõlõ tõrõwau. Famotokhi Taromali Lowalangi Sinanõ ba dõdõ tehalõ moroi ba zura Amaedola 3 : 6 Bõi aefa dõdõu khõ-Nia, gofu hadia ia lala khõu, ba Ya’ia zangadõlõ tõrõwau. Fangandrõ Fondruhõ Wamotokhi Taromali Jemaat : Manunõ moroi ba Mbuku Zinunõ No. 154 TUHO WAMATI Liturgos : Me no tarongo daroma Li Lowalangi, ba da tafaogõ lida wamaduhu’õ famatida ya’ita niha Keriso fõna Lowalangi, muzizio ita fefu... endronga lida: Ya’o mamati khõ Lowalangi Ama si lõ ambõ fa’abõlõ, sombõi banua si yaẅa awõ danõ. Ya’o mamati khõ Yesu Keriso, So’aya ya’ita, Ono Lowalangi si ha samõsa, nitema nina-Nia Maria khõ Geheha Ni’amoni’õ, ono nono alawe Ia, no manaõgõ huku Ia, barõ mbawa Fondrio Filato, teforõfa Ia, mate, ba lako’o. No mõi Ia ba mbanua niha tou, no maoso Ia moroi ba ngai zimate me no irugi tõlu ngaluo. No manahae Ia, mõi ba zorugo, dumadao ba gambõlõ Lowalangi Ama si lõ ambõ fa’abõlõ. I’otarai da’õ mangawuli Ia dania ba wanguhuku niha sauri, awõ zi no mate. Ya’o mamati khõ Geheha Ni’amoni’õ, ba ufati ha sambua mbanua ni’amoni’õ, fefu niha Keriso, fa’awõsa niha ni’amoni’õ, ba fangefa horõ, ba femaoso mboto zimate, ba fa’auri si lõ aetu. Yaduhu! Liturgos : Mudadao Zato. WARTA JEMAAT (Klik untuk membuka) Liturgos : Manunõ ita moroi ba Mbuku Zinunõ No: 282 Böi irörö ndra’o hare, ba gulidanö. Fefu gisö’isö dödö, ya u’erogö. Ha sambalö sa zaro, si lö mamalömalö. Na Öfanema ndra’odo, fa’auri andrö. FANGANDRÕ SALAHI + FAMATENGE + HOWUHOWU Pengkhotbah : Sumindro ita fefu, mangandrõ ita: (tetohugõ) "Ba dõi Zo’aya ya’aga Yesu Keriso, si no mamahaõ ya’aga ba wangandrõ mamane:" Pengkhotbah + Jemaat : He Ama khõma si so ba zorugo, ya te’amoni’õ dõi-U. Ya tobali banua-U fefu niha, ya itõrõ zomasi Ndra’ugõ, hulõ ba zorugo, ya si manõ gõi ba gulidanõ. Õma sirugi ma’õkhõ be’e khõma ma’õkhõ andre. Ba efa’õ khõma horõma, si mane fangefa’õma sala ba zi so sala khõma. Bõi ohe ndra’aga ba wanandraigõ, efa’õga ba zi lõ sõkhi. Me ya’ugõ zamatõrõ banua-U, ba sokhõ fa’abõlõ, awõ lakhõmi, irugi zi lõ aetu. Yaduhu. Pengkhotbah : Mi’angawuli sifao fa’ohahau dõdõ, yatobali ami sura Keriso, samaduhu’õ Ya’ia ba lala wa’aurimi sero ma’õkhõ, ba mitema howuhowu Lowalangi: Ya mufahowu’õ ami Lowalangi, Ya murorogõ ami; Ya mufohaga mbawa-Nia khõmi, Ya mu’ebua’õ dõdõ-Nia khõmi; Ya mufalemba hõrõ-Nia khõmi, Ya mubè’e wa’ohahau dõdõ khõmi fefu. Yaduhu! Jemaat : Manunõ moroi ba Mbuku Zinunõ No. 282 : 3 Eheha Ni’amoni’ö, zanolo ya’o. Sangoroma ba dödögu, röfa Keriso. Ululu wa’aurigu, wanunonuno Yesu. U’oigö sibai dödögu, wolo’ö Yesu. Pengkhotbah : Ya'ahowu!!! Jemaat : Ya'ahowu!!! *** IBADAH SELESAI ***