Tata Ibadah Akhir Tahun Gerejawi (Fanõrõ Tõdõ Si Lõ Aetu) Bahasa Nias

Download Tata Ibadah (DOC)

Download Tata Ibadah (PDF)

23 November 2025 (Fanӧrӧtӧdӧ Fa’auri si lӧ aetu) [Tedõni dorosi, mõi ndra sohalõwõ bakha ba gosali, ba lahalõ wangahono dõdõ banua niha Keriso ba wangondrasi ba ba wasumangeta khõ Lowalangi] FANGOWAI BA FOGAONI FANGOWAI Liturgos : Ya’ami banua Zo’aya. Ma’ökhö andre no tarugi ba Gangohorita Ndröfi Niha Keriso. Ya sowuawua tödö ita ba we’amöi föna Keriso ba wanötöna fa’auri si lö aetu. Ma’owai ami ba döi Zo’aya ya’ita Yesus Keriso, Ya’ahowu! Jemaat : Ya'ahowu! Liturgos : Yafao-fao khõmi Lowalangi! Jemaat : Ya fao khõu Geheha-Nia! FOGAONI Liturgos : Da ta’owuawua’õ dõdõda wangondrasi Yehowa, da ta’omusoi’õ dõdõda ba wamalua fasumangeta khõ Lowalangi. Tasuno Ia, manunõ ita moroi ba Mbuku Zinunõ No. 421 He na saösö wofanögu, ba wondröi ulidanö. Yesu zawatö dödögu, so’ahonoa dödö. Omuso dödögu, wondrugi khamötögu. Fa ohahau dödögu, si lö mamalömalö. Si lö famaedo ba danö, zi falukha ba da’ö. So khögu wehulu dödö, irege no ukhamö. Ugohi zawatö, si lö tebulöbulö. Lö’ö fa’abu dödö, maulu omuso dödö. Lö manö ufatou tödö, harato gulidanö. He göi omasiö dödö, lö fao khögu sa’atö. U’oigö dödögu, wolohi fa’atulö. Lalagu ba wogamö, naha sohahau dödö. U’osambalö’ö dödö, wamalua satulö. Utaögö he na afökhö, he oya wanandraigö. Ufati, u’o’ö, fefu niwa’ö Zokhö. Me dozi sanau ölö, lakhamö dötönafö. FANGA’ARO’Õ WA’OWULO (VOTUM) Liturgos : Da tahonogõ dõdõda ba wariawõsa, ba ba wa ha sambua khõ Lowalangi, muzizio zato. No owulo ita ba da’e, ba dõi Lowalangi Ama, ba ba dõi Nono-Nia Yesu Keriso, ba ba dõi Geheha Ni’amoni’õ. Fangorifida ha ba dõi Yehowa si no mombõi banua si yaẅa awõ danõ! Jemaat : Yaduhu! Liturgos : Si manõ zi mõna andrõ, nifonukha nukha safusi, ba lõ’õ manõ sa’ae Ubunu dõinia ba zura wa’auri andrõ, ba U’ombakha’õ dõinia, ba zi so Amagu, ba ba zi so mala’ika andrõ khõ-Nia! HALELUYA! Liturgos : Mangandrõ ita, "He So’aya ya’aga Yesu Keriso, Lowalangi sauri ba sangorifi. He matörö mbawa danö si göna lumö wa’amate, ba lö khöma fa’ata’u, me no Ya’ugö Gubaloma, sondrorogö ya’aga. Tebai i’alani ndra’aga fa’amate, me no Ya’ugö zangorifi ya’aga. Möiga khö-U ba wanou’ö boto awö nosoma, me no Ya’ugö zokhö ba samatörö fa’auri ba fa’amatema. He Ama ma’andrö khö-U, rorogö ba fatöröga ba zomasi Ndra’ugö irugi gamozua, famakhamö nahia ba zi so Ya’ugö. Si lö mamalömalö nisuno ba nifolakhömi Ndra’ugö, awö Zo’aya ya’aga Yesu Keriso ba Eheha Ni’amoni’ö. Yaduhu!" Mudadao Zato Liturgos : Manunõ ita moroi ba Mbuku Zinunõ No. 424 Duhu wa’oya gakaola, ba wolo’öda li Nama, sagötö fa’aurida. Andrö ta’ondrasi haga, si’oroi Lowalangida, umbu wangorifida. Da tafa’anö dödöda, ta’aro’ö wamatida. Dozi niha sango’aya, sangaohasi ba dödöra, fa’omasi Zo’aya. Sanguma’ö lö moguna, wamohouni era’era, si’otarai Geheha. Fa’amate si lö aetu, da’ö luora dania. Lö molala gangandröwa, na inötö wa’alua, wangawuli Zo’aya. Lö tebulö wa latema, zulö ngawalö nilaura, isö’isö dödöra. Fangaröngarö luora, si fao fatangisa mboha. Da tafahela tödöda, ba wanga’i angetula, heza zomasi ita. Eheha si’oroi Nama, zamè khöda fangi’ila, ba wangerai bongida. Sangatulö’ö tödöda, sangehao era’erada. Ba na mangesa dödöda, ba horö fefu nilauda, tasöndra göi wangefa. Yesu zolohe ya’ita, wefao ba lakhömi Nama, fa’auri no fahöna. Da ta’andrö khö Zo’aya, ya Ibè anau gölöda. Da ta’alui wa’atulö, ni’oroi’ö Yesu andrö sandrohu fa’aurida. Me lö ta’ila ginötö na tohare Zangatulö, wangai tana khö-Nia. Na no tafa’anö ita, fa’auri-Nia tatema. FOMBASO TAROMALI LOWALANGI (AMABU'ULA LI SIFÕFÕNA) Liturgos : Da tafondrondrongo daroma Li Lowalangi, tehalõ moroi ba zura Zefania 1 : 1-7 1 Taroma li Yehowa, khõ Zefania andrõ, ono Gedalia ono Gamaria ono Hisikia, me luo razo mado Yuda Yosia, ono Gamoni. 2 Ufarahugõ wanibo fefu hadia ia ba guli danõ! iwa’õ Yehowa. 3 Uhori niha, fabaya urifõ niha, uhori wofo ba dalu mbanua ba i’a ba nasi, ba fangala andrõ, fabaya sebua horõ, uhori niha ba guli danõ! iwa’õ Yehowa. 4 U’oro’õ dania dangagu yawa mado Yuda ba yawa mbanua Yeruzalema, ba uhori ba da’õ dõi Mba’ali andrõ ba tõi gere nadu andrõ, fabaya ere, 5 awõ fefu zangalulu ba ngahõnõ ba mbanua si yawa, ba dete nomora yawa, awõ zangalulu andrõ, si mõi ba hõlu ba khõ Yehowa ba same’e hõlu gõi Milikomo andrõ, 6 awõ zi no mangerogõ Yehowa, si lõ mangalui ya’ia, si lõ manofu ya’ia! 7 Bõi mihedehede fõna Yehowa, So’aya! Me no ahatõ mbawa andrõ khõ Yehowa; no i’asiwai zumange Yehowa, no i’amoni’õ nikaoninia andrõ. Si manõ daroma Li Lowalangi, da tatema’õ faoma sinunõ moroi ba Mbuku Zinunõ No. 20 : 1 FANGANDRÕ FANGEFA HORÕ Liturgos : Ya’ami ira talifusõ, Na taŵa’õ lõ horõda, ba talimo ita, ba si duhu lõ’õ ba dõdõda. Na ta’ombakha’õ horõda, ba lõ farõi Ia, ba no satulõ Ia, fa I’efa’õ khõda horõ andrõ, Ihaogõ ita, awõ wa Iheta fefu zi lõ atulõ. Andrõ da mõi ita fõna Lowalangi si fao fangidengide’õ ba wangombakha horõda, muzizio zato. Mangandrõ ita, "He Yehowa Lowalangi si so ba zorugo yawa. No sowuawua tödö ndra’aga, börö howuhowu-Mö si no Ö’amualagö ba wa’aurima irugi ma’ökhö andre. Aboto ba dödöma wa no Ya’ugö gumbu wa’auri, ba no Ya’ugö gamozua wa’aurima. Ba hiza mafaduhu’ö wa tenga sinangea ndra’aga tanö föna-Mö, me no fahöna horö si no mafalua i’otarai iraono ndra’aga, he ba gera’era dödöma, fehedema awö gamuatama si lö faudu ba daroma Li-Mö. Asese ma’osiwawöi ginötö nibe’e-U khöma, ba ambö ndra’aga wangoguna’ö tödö satuatua ba wangerai bongima, ba no malulu wa’aurima nifatörö gisö’isö dödö wa’a’ösi niha. Andrö möiga khö-U ba wangandrö fa’ahakhö dödö-U, ena’ö Ö’efa’ö khöma horöma andrö, si no mafalua, irege sohahau tödö ndra’aga wanohugö fekolima ba ginötöfönama si faudu ba zomasi Ndra’ugö." Liturgos : Mangandrö ba dödö zamösana föna Lowalangi… (Mangandrö zamösana sambil diiringi musik instrumen) Liturgos : Hakhösi dödö-U khöma Ama, ba be’e aefa khöma horöma andrö ma’afefu, Yaduhu! “NA UBINI’Ö HORÖGU KHÖ YESU” Jemaat : Manunö moroi ba Mbuku Zinunö No. 224 : 1 Liturgos : Sahakhõ tõdõ Yehowa ba sebua tõdõ; ebolo sibai dödö-Nia ba no obõwõ sibai Ia. Lõnibe’e-Nia dali horõda balõ nisulõni-Nia khõda olalõwada. Simane fa’ahakhõ dõdõ nama nononia, simanõ wa’ahakhõ dõdõ Yehowa zangata’ufi Ya’ia. Lakhõmi khõ Lowalangi si yawa! Jemaat : Manunõ moroi ba Mbuku Zinunõ No. 450 Liturgos : Dumadao Zato! FOMBASO TAROMA LI LOWALANGI (AMABU'ULA LI SIBOHOU) Liturgos : Da tafondrondrongo daroma Li Lowalangi, tehalõ moroi ba zura Mataio 25 : 31-34 31 Ba na so Nono Niha, na si so lakhõmi ia, na fao khõnia mala’ika andrõ fefu, ba da’õ dania dumadao ia ba dadaoma lakhõminia andrõ. 32 Ba te’owuloi dania fõnania fefu soi, ba ifõfõ’õ ira, si mane na ifõfõ’õ ira mbiribiri si alawe mbiribiri si matua kubalo. 33 Ba ifa’aso ba gambõlõnia mbiribiri si alawe, ba ba gaberania mbiribiri si matua. 34 Ba imane dania razo andrõ ba zi so ba gambõlõnia: Mi aine, ya’ami, nifahowu’õ Namagu, mitema gondrõita andrõ, banua andrõ, ni’asiwai khõmi, i’otarai mbõ õta danõ. Ya’ahowu zamondrongo taroma Li Lowalangi ba same’e ba dõdõ (Luka 11:28) Jemaat : Yaduhu! FANGOWULOI FASÕMBATA Liturgos : Iada’e tebe’e khõda ginõtõ ba wolohe fasõmbatada khõ Lowalangi. Ta’osamuzaigõ wame’e, he fasõmbata si fõfõna, ba si manõ gõi zi mendrua awõ zi medõlu. Ba si ofõna ua da tafondrondrongo Li Lowalangi me imane: "Ba da’õ niwa’õgu: Na so zangatalisi tanõmõ, ba lõ oya’oya ibasi, ba na so zi lõ alimagõ tanõmõ, ba oya gõi ibasi dania. Ba balazi dõdõ zamõsana; bõi abu dõdõ, ba tenga niforege; si no aoha gõlõ fame’e, da’õ sa zomasi Lowalangi." (II Korindro 9:6-7) Tafa’ema fõna wasõmbata khõ Lowalangi, ba manunõ ita moroi ba Mbuku Zinunõ No. 261 2. Ya’e zumange fasõmbata ma be’e soroi ba dõdõma. 3. Ya’e zumange fasõmbata buala si’otarai Nama. 4. Ya’e zumange fasõmbata, boto, noso, ba fa’aurima. 5. Ya’e zumange fasõmbata, lõ irugi zomasi dõdõ-U. 6. Ya’e zumange fasõmbata, ma’aohasi gõlõ Zo’aya. Liturgos : Da tafasao wasõmbatada andre fõna Lowalangi, musindro ita fefu. [Koordinator Pelayan mangandrõ. Na inõtõ wama'ema fasõmbata Ni'ofulu, aefa wangandrõ Koordinator Pelayan, ba ifa'ema Daroma Li Lowalangi Sangai Huhuo Sebua (Pendeta)] Liturgos : Mudadao Zato! KOOR/VOCAL GROUP Liturgos : Da tafa’anõ dõdõda wamondrongo taroma Li Lowalangi, manunõ ita moroi ba Mbuku Zinunõ No. 163 [Pengkhotbah Mõi ba Mimbar] HUHUO SEBUA Pengkhotbah : Ya irorogõ dõdõmi, awõ gera’erami fa’ohahau dõdõ andrõ, khõ Lowalangi, sabõlõ moroi ba gera’era niha fefu, ba khõ Keriso Yesu. Mangandrõ ita...[Fangadrõ Famokai Huhuo Sebua] Amin. Pengkhotbah : Fatua lö tabaso mbörö huhuo da tafondrondrongo ha wa’ato zi tumbu awö zi no mate barö ndröfi andre. Situmbu: - Ira matua: -- niha - Ira alawe : -- niha Jumlah       : -- niha Simate: - Satua   : -- niha - Iraono : -- niha Jumlah : -- niha Pengkhotbah : Musindro Zato... Manunõ ita moroi ba Mbuku Zinunõ No. 410:1 [Fombaso Taroma li, moroi ba Roma 14:7-9] 7 Lõ’õ sa ba khõda sauri, ba khõnia manõ, ba lõ si mate, ba khõnia manõ. 8 Na auri ita sa, ba khõ Zo’aya wa’aurida, ba na mate ita, ba khõ Zo’aya wa’amateda; tobali, he sauri ita, ba he si mate ita, ba khõ Zo’aya ita. 9 Da’õ sa mbõrõ, wa mate Keriso, awõ wa no ifuli auri, ena’õ ifatõrõ zi no mate, awõ zauri. Pengkhotbah : Manunõ ita moroi ba Mbuku Zinunõ No. 410:2 [Fombaso Taroma li, moroi ba I Korindro 15:54b-57] 54b Ba awena itõrõ daroma li andrõ, si so ba zura: ”No alõmõ wa’amate andrõ ba wemõna. 55 Hezo wemõnau, fa’amate? Hezo duomõ, fa’amate?” 56 Ba tuo wa’amate andrõ, ba ya’ia horõ andrõ, ba fa’abõlõ horõ andrõ, ba ya’ia goroisa. 57 Ba nisuno Lowalangi same’e khõda femõna andrõ, moroi khõ Zo’aya ya’ita andrõ, Yesu Keriso. Pengkhotbah : Manunõ ita moroi ba Mbuku Zinunõ No. 410:3 Fombaso Taroma Li Lowalangi moroi ba zura Fama'ele'ö 20 : 11-15 11 Ba u’ila dadaoma sebua, safusi, awõ zidadao yawa; ba wamaiginia moloi danõ, fabaya banua si yawa, ba lõ falukha naha khõra. 12 Ba u’ila zi no mate fefu, he satua, ba he iraono, fõna dadaoma andrõ so ira, ba tebokai zura; ba tebokai zura bõ’õ, ya’ia zura wa’auri andrõ. Ba tehuku zi mate andrõ, balazi nisura ba zura andrõ, dali mbuabuara. 13 Ba ibe’e baero asi zi mate andrõ khõnia, ba fa’amate andrõ, ba banua tou, ba labe’e baero zi mate andrõ, khõra, ba tehuku, dali mbuabua zamõsana. 14 Ba fa’amate andrõ, ba banua tou, ba tetibo’õ ba mbawa alitõ andrõ, ya’ia wa’amate si samuza andrõ, bawa alitõ. 15 Ba na so zi lõ musõndra tõi, na lõ mutanõ ba zura wa’auri, ba tetibo’õ ba mbawa alitõ andrõ. Famotokhi Taromali Lowalangi Sinanõ ba dõdõ tehalõ moroi ba zura Fama'ele'ö 20 : 15 Ba naso zi lö musöndra töi, na lö mutanö ba zura wa'auri, ba tetibo'ö ba mbawa alitö andrö. Fangandrõ Fondruhõ Wamotokhi Taromali Jemaat : Manunõ moroi ba Mbuku Zinunõ No. 154 TUHO WAMATI Liturgos : Me no tarongo daroma Li Lowalangi, ba da tafaogõ lida wamaduhu’õ famatida ya’ita niha Keriso fõna Lowalangi, muzizio ita fefu... endronga lida: Ya’o mamati khõ Lowalangi Ama si lõ ambõ fa’abõlõ, sombõi banua si yaẅa awõ danõ. Ya’o mamati khõ Yesu Keriso, So’aya ya’ita, Ono Lowalangi si ha samõsa, nitema nina-Nia Maria khõ Geheha Ni’amoni’õ, ono nono alawe Ia, no manaõgõ huku Ia, barõ mbawa Fondrio Filato, teforõfa Ia, mate, ba lako’o. No mõi Ia ba mbanua niha tou, no maoso Ia moroi ba ngai zimate me no irugi tõlu ngaluo. No manahae Ia, mõi ba zorugo, dumadao ba gambõlõ Lowalangi Ama si lõ ambõ fa’abõlõ. I’otarai da’õ mangawuli Ia dania ba wanguhuku niha sauri, awõ zi no mate. Ya’o mamati khõ Geheha Ni’amoni’õ, ba ufati ha sambua mbanua ni’amoni’õ, fefu niha Keriso, fa’awõsa niha ni’amoni’õ, ba fangefa horõ, ba femaoso mboto zimate, ba fa’auri si lõ aetu. Yaduhu! Liturgos : Mudadao Zato. ANGOMBAKHATA GEREJA WARTA JEMAAT (Klik untuk membuka) Liturgos : Manunõ ita moroi ba Mbuku Zinunõ No. 498 Fa’anõ’õ, he tõdõ, fa’anõ’õ, tõdõ, haogõ ae ndra’ugõ. Rõi dõdõ si ta’unõ, tõdõ si ta’unõ, ba bohouni’õ. Reff: Omusomuso dõdõ... 2x Lõ sangila inõtõ, sangila inõtõ, mbaŵa wanguhuku. Hulõ na so zanagõ, fe’aso zanagõ, lö mutötö’u. Reff: Omusomuso dõdõ... 2x Ba bõi õtõ ginõtõ, bõi õtõ ginõtõ, lau wangesa dõdõ. Ae tutunõ khõ Zokhõ, tutunõ khõ Zokhõ, horõ nilaumõ. Reff: Omusomuso dõdõ... 2x FANGANDRÕ SALAHI + FAMATENGE + HOWUHOWU Pengkhotbah : Sumindro ita fefu, mangandrõ ita: (tetohugõ) "Ba dõi Zo’aya ya’aga Yesu Keriso, si no mamahaõ ya’aga ba wangandrõ mamane:" Pengkhotbah + Jemaat : He Ama khõma si so ba zorugo, ya te’amoni’õ dõi-U. Ya tobali banua-U fefu niha, ya itõrõ zomasi Ndra’ugõ, hulõ ba zorugo, ya si manõ gõi ba gulidanõ. Õma sirugi ma’õkhõ be’e khõma ma’õkhõ andre. Ba efa’õ khõma horõma, si mane fangefa’õma sala ba zi so sala khõma. Bõi ohe ndra’aga ba wanandraigõ, efa’õga ba zi lõ sõkhi. Me ya’ugõ zamatõrõ banua-U, ba sokhõ fa’abõlõ, awõ lakhõmi, irugi zi lõ aetu. Yaduhu. Pengkhotbah : Mi’angawuli sifao fa’ohahau dõdõ, yatobali ami sura Keriso, samaduhu’õ Ya’ia ba lala wa’aurimi sero ma’õkhõ, ba mitema howuhowu Lowalangi: Ya mufahowu’õ ami Lowalangi, Ya murorogõ ami; Ya mufohaga mbawa-Nia khõmi, Ya mu’ebua’õ dõdõ-Nia khõmi; Ya mufalemba hõrõ-Nia khõmi, Ya mubè’e wa’ohahau dõdõ khõmi fefu. Yaduhu! Jemaat : Manunõ moroi ba Mbuku Zinunõ No. 498 : 5 Andrõ khõu wa’abõlõ, famati folo’õ, bõi mamalõmalõ. Hõna khõu wa’atulõ, fa’atulõ dõdõ, bongi ma’õkhõ. Reff: Omusomuso dõdõ... 2x Pengkhotbah : Ya'ahowu!!! Jemaat : Ya'ahowu!!! *** IBADAH SELESAI ***